Ipandla imvulele amathuba womsebenzi

Umlingisi okhamba phambili uThulani Mtsweni uthi ipandla kanye nentshebe yakhe zimvulele iminyango eminengi emkhakheni wokulingisa. 

Lokhu kumenza abonakale begodu ahluke kunabanye abalingisi.

UThulani uthi akaziboni aguda ihloko kanye nentshebe yakhe ngombana zimsiza ukubeka uburotho etafuleni.

Umlingisi oneminyaka ema-39 ubudala, begodu nobuya eTsakane, e-Ekurhuleni, uthe nanoma angathola indima efuna bonyana agude ehloko, uzakwenza lokho kuphela nangabe uzokubhadelwa umrholo ophezulu khulu.

UThulani, wazenzela igama emikhiqizweni emikhulu efana ne-Isidingo, i-Isibaya, i-Gomora, i-Black Gold kanye ne-Isiphetho: Destiny ngepandla yakhe enganazo iinhluthu nentshebe.

Njenganje, udlala umelaphi wendabuko uPondo ku-Uzalo edlala ku-SABC1.

FUNDA NALOKHU: https://ilangabinews.co.za/uthola-indima-ekulu-ku-land-of-mills-and-money-ku-e-tv/

Ungomunye wabalingisi abaphambili abadlala uMancinza kufilimini etja ye-Shut Up! Men Are Talking, edlale kokuthoma ku-MovieRoom DStv Channel 113 ngoMvulo, ngomhlaka 31 kuRhoboyi.

UThulani, owaduma ngonyaka ka-2017 ngendima yakhe ehlekisako uBhekizizwe Sibiya ku-Isidingo, utjele i-Daily Sun bonyana uthethe iminyaka eminengi afuna iindima ngesikhathi asaguda ihloko nentshebe yakhe.

 Kodwana khange athole iindima emidlalweni.

“Ngemva kokobana ngithathe isiqunto sokulisa ipandla yami nentshebe yami, kulapho engabonakala khona ngathoma nokuthola imisebenzi eminengi. 

“Lokho kwenza abantu bonyana bangikhumbule,” kwaveza uThulani.