AmaSewula Afrikha akhumbuza uChidimma ngalokho akukhulumako ngo-2024
UChidimma Adetshina, uragela phambili nokulwela ukungakhitjhwa enarheni yeSewula Afrikha.
UChidimma obegade anguMiss Universe Nigeria ngaphambilini, uneminyaka ematjhumi amabili nahlanu (25).
UChidimma uvele eKhotho yakaMarhastrata eCape Town evekeni le ukuzokulalela icala lakhe njengoba aphikisana nomyalelo owakhitjhwa Mnyango wezaNgekhaya.
Umyalelo lo uphinde uthinte nendodana yakhe encani.
lokhu kulandela iphenyo lokuba ngenarheni yeSewula Afrikha ngaphandle kwamaphepha afaneleko elaphela ngokuthi iinkhulu zomthemtho zimemezele uChidimma njengomuntu ongakavumeleki enarheni le, ngebanga lezinye iinsolo eziphathelene namaphepha wakhe.
Ngesikhathi alwa icala lakhe lezomthetho, abantu abanengi eenkundleni zokuthintana bamtjela bonyana abuyele enarheni yekhabo iNigeria.
UChidimma owabelethelwa eSoweto ngo 2001, waphendule amezwi akhulunywe babantu eenkundleni zokuthintana.Wahlathulula bonyana amanye amezwi awakhiphako ngaphambilini akhange bawazwisise.
Abantu eenkundleni zokuthintana bamkhumbuze amezwi awatjhoko ngesikhathi avakatjhela eNigeria ngo-2024, lapho athi akasabuyi. Wathi bekatjho ukuthi akabuyi ngaleso sikhathi, ingasi bona angekhe asabuya unomphela.
