Abanengi bakhohliwe ngoNelson Mandela, ingasi uNaomi Campbell

UNaomi Campbell ukhumbule umngani wakhe ongasekho, uNelson Mandela ngelanga lakhe lokubelethwa ahlanganisa iminyaka eli-108.

UNaomi Campbell bekabiza uNelson Mandela ongasekho ngo “Tata” wathi amezwi neemfundiso zakhe zihlezi ehlizweni yakhe.

UCampbell wahlangana noMandela ngo-1994, wambiza ngokuthi ngubamkhulu wakhe begodu waseka nemisebenzi ye-“charity” ehlobene noMandela.

Kanye namaphrojekthi asebenza ngaphasi kwe-Nelson Mandela Children’s Fund.

“Langa elihle lokubelethwa ezulwini Tata. Ngithanda amezwi wakho, owakhulumako nalawo ongakhange uwakhulume kimi. Uhlala  usehlizweni yami,” watlola ku-Instagram.

UCampbell wahlangana noMandela kokuthoma ngo-1994 ngemuva kwekhetho lokuthoma letando yenengi eSewula Afrikha. 

Bese bakha ubungani ngokukhamba kweminyaka, begodu bekavamise ukumbiza ngokuthi ngubamkhulu wakhe.

FUNDA NALOKHU: https://ilangabinews.co.za/uconnie-ferguson-ukhuluma-ngokuthi-wahlangana-njani-noshona/

Isakhamuzi senarha yeAmerica, sibuye sabelana ngamanye amezwi kaMandela mayelana nebumbano, itando yenengi kanye nokwakhiwa kabutjha kweSewula Afrikha ngemuva kwebandlululo.

Umyalezo munye bewuthi abantu akukafaneli bonyana bahlukaniswe zizinto abahluke ngazo, kodwana ngokuthi ngabe bayayiseka intando yeningi na.

Wabelana godu ngamezwi wakhe mayelana nokuthi iSewula Afrikha ikhetha ukuthula nokwakha kabutjha kunezondo nokuphindisela.

UMandela wabelethwa ngomhlaka 18 Velabahlinze 1918, wadlula ephasini ngomhlaka 5 Nobayeni 2013 aneminyaka ema-95 ubudala.