U-Penny Ntuli uvusa iinsolo zokuphathwa kumbi e-Jozi FM

Obegade amrhatjhi we-Gagasi FM ne-Jozi FM, uPenny Ntuli, uvuse ikulumo ngemva kokuthi athi uzokugubhulula okumbi okwenzeka ngaphakathi kwe-Jozi FM.

Emazwini wakhe, uveze bona kunomuntu osesikhundleni esiphezulu osebenzisa amandla ngendlela embi, begodu lokhu kuthinta abasebenzi, khulukhulu labo esele basebenze isikhathi eside esitetjhini.

UNtuli ukhulume ngobukhali eenkundleni zokuthintana, waveza nokukwata kwakhe ngendlela umuntu lo aphatha ngayo abanye abantu.

FUNDA NALOKHU: https://ilangabinews.co.za/ulimpopo-boy-uphika-ukusulwa-kwe-world-tour-10/

Uthe: “Ngyeza nakulengungumbana enepandla ecwebezelako nokukhulu ukudelela nokungabazi abantu nabasebenzi abadala kunaye,” okutjengisa ubuhlungu nobudisi bendaba le kuye.

Ubuye godu wanaba ngesehlakalo asibona siyihlazo, lapho isisebenzi esidala sathunywa khona ukuyokwenza itiye nanyana lokho kungasi yingcenye yomsebenzi waso.

Njengombana akutjho: “Uthume umuntu omdala ayokwenzela itiye when you know that’s NOT part of their Job Description, kodwa balenze because bancenge uburotho,” okusitjela ngobujamo bokusaba emsebenzini.

Ngaphezu kwalokho, uNtuli usole nokuthi osinye isisebenzi sagcina silila umsebenzi ngebanga lokuziphatha kwaloyo muntu.

Amezwi wakhe athi: “Ingane yaze yalisa emsebenzini ngenca ufuna isingezansi sbotho nokukhulu ukungahlazeki,” yenza abanengi bacabange ngobujamo bangaphakathi esitetjhini.

Nanje, akakavezeli umphakathi ibizo lomuntu amsolako, begodu akukacaci bonyana uzokuphuma yini nobufakazi obupheleleko.

I-Jozi FM yona ayikaphenduli tjhatjhalazi ngeensolo lezi.