Uveza ozokuthatha iskhundla saka Sizwe Dhlomo unomphela

U Sol Phenduka obegade amrhatjhi ngaphambilini e Kaya 959 uthi u DJ Fresh kungenzeka angene eskhundleni saka Sizwe Dhlomo unomphela.

Uthi u Thomas Msengana, ongene eskhundleni saka Dhlomo kweskhatjhana kungenzeka angahlali unomphela eskhundleni lesi.

Abantu abanye basola bonyana u Sol Phenduka kanye no Mpho Popps ngibo abazokuthatha iintambo ehlelweni leli laku Kaya 959.

U Sizwe Dhlomo uveze indaba yokulisa umsebenzi kubalaleli be hlelo lo mrhatjho i Siz The World ngemva kweminyaka emithandathu.

Nanoma atjele abalaleli bonyana uzokuqhubeka ngokurhatjha kuze kuphele ikontraga yakhe ngo Julayi 2026, kodwana umrhatjho lo uveze bonyana ukulisa kwakhe umsebenzi kwathoma mhlokho.

Ngemva kokuveza lokho, umrhatjho we Kaya 959 wabika bonyana u Thomas Msengana uzokungena eskhundleni saka Sizwe Dhlomo okweskhatjhana.

Umrhatjho lo uveze godu bonyana isqhema esitjha se hlelo lekuseni sizokwaziswa inyanga ezako.

U Sol Phenduka uveze ehlelweni le Podcast and Chill with MacG eliphume ngo Losine ngomhlaka 28 Meyi 2026 iinsolo zokobana u DJ Fresh angathatha iskhundla saka Dhlomo unomphela.

Utjele u MacG kanye no begade avakatjhe ehlelweni u Bongani Dube, bonyana u Greg Maloka obegade amlawuli omkhulu (Managing Director) ku Kaya 959 angahle abuyele estetjhinini lesi.

U Maloka walisa umsebenzi ngo Nobayeni enyakeni ka 2020 ngemva kokusolelwa balingani bakhe babafazi emrhatjhweni ngokungaziphathi kuhle ngokobudlelwano.