Uzikhipha eensolweni zokuhlekisa ngoNonhle Thema

USomizi Mhlongo ulandule ukuhlekisa ngoNonhle Thema ngemuva kokuthi kusatjalaliswe ividiyo yakhe ye-TikTok.

UMhlongo ubuye godu wahlasela abantu abamsole ngokuhlekisa ngoNonhle Thema, ngemva kokuthi ividiyo le ivele emva komcociswano kaThema nomrhatjho we-947.

UThema, obegade amrhatjhi we-Channel O eminyakeni eminengi edlulileko, utjele umrhatjhi uThando Thabethe ku-947 Drive ukuthi nguye owazisa abantu beSewula Afrikha nge-Twitter. Lokhu kubange imibono eminengi eenkundleni zokuthintana.

Abanye bakunyaza lokho, abanye bamvikela. Baveza nokuthi uThema ngomunye wabosaziwako abaduma khulu ngo-2000, kade ngaphambi kokobana kube khona abosaziwako besimanje (influencers).

Abantu ezinkundleni zokuthintana bagubhulule ama-tweets wakhe wakade weminyaka ema-15 edlulileko, bamkhomba ngemino ngokuzikhukhumeza kwakhe ngesikhathi asadume khulu.

NgoSonto ngomhlaka 19 Velabahlinze 2026, uSomizi wathumele ividiyo ku-TikTok aveza umbono ngendlela uThabethe bekangakhona ebusweni uThema nakakhuluma naye ngesikhathi asadume khulu.

Ividiyo kaMhlongo yakhwezelela umlilo eenkundleni zokuthintana, abanye abalandeli bamsola ngokuhlanganyela ekuhlekiseni ngoThema.

USomizi ukuphikile lokhu wathi: “Asisakwazi yini ukuzijabulisa? Bengingahlekisi ngalitho.

Bekumsindo ebengiqabanga bonyana muhle begodu ngisaqabanga ukuthi muhle!”USomizi noThema abakhange batjho bonyana kukhona ukungazwani phakathi kwabo.