Abalandeli bathola ikhambo lamatekisi elitjhipileko ukuya emngcwabeni kaScebi

Abalandeli be-Maskandi abasuka eGauteng neFree State bazokuthola ikhambo lamatekisi elitjhipileko lokuya eKwaZulu-Natal ukuyokuvalelisa kokugcina uScebi Dlamini.

UScebi, owaziwa khulu ngokuthi ngu’Inkosi yamaGcokama’, uzokufihlwa eMsinga, eMidlands esfundeni saKwaZulu-Natal, ngoMgqibelo.

Umngcwabo wakhe uzokubanjelwa eNkundleni yezemidlalo iMzisho eMakhunwini.

Iinhlangano zamatekisi zingenelele ukwenza ikhambo labalandeli abafuna ukuya emngcwabeni libe ngconywana.

UGodole Mdletshe, womkhakha wamatekisi uthe abatjhayeli bamatekisi eGauteng bathethe isiqunto sokusiza abalandeli ngokulekelela ngeenthuthi ngenani eliphasi.

Abalandeli abasuka eGauteng bazokubhadela i-R350 ukuya nokubuya.

Iinhlangano zamatekisi eFree State nazo zizokulekelela abalandeli besfunda lesi ngamanani aphasi.

Abalandeli abasuka eBloemfontein bazokubhadela i-R650, ukuya nokubuya emngcwabeni.

Iindleko lezi ezitjhipileko kulindeleke bonyana zisize abalandeli abanengi ukuthi bakwazi ukuya eMsinga njengoba umphakathi we-Maskandi ulungiselela ipelaveke ebuhlungu.

UDlamini udlule ephasini ngemva kwengozi emasikizi yekoloyi eRichards Bay.

Lokhu kuthuse khulu umkhakha womvumo we-Maskandi kwabuya kwavusa imiyalezo yokutjhiriya nokuhlonipha okuvela kubalandeli, kubavumi, nakubasekeli.

Umvumi nogida ngaphasi kwakhe, uSipho Gumu “Gupta” Mchunu, naye udlule ephasini ngengozi le.

UMchunu uzokufihlwa ngoLosihlanu, ilanga linye ngaphambi komngcwabo kaDlamini.