AmaNdebele asalela khulu ekorweni yakumabonakude
Ambalwa amaNdebele ekorweni kamabonakude njengabatloli, abavezi, abalingisi, abathuli bamahlelo, njalonjalo.
Lokhu kwenze bona abatjhotjhozeli besiNdebele uThando Mahlangu noSkhumba Masango basungule ijima elibizwa ngokuthi yi-“We Need AmaNdebele on TV.”
Lihlele ukutjhotjhozela iinhlangano zokurhatjha — isikakhulukazi i-SABC — bona kube namahlelo wesiNdebele eentetjhini zawo zakamabonakude.
Ngokuya ngokweembalobalo, amaNdebele ahlangana namaSwati namaTsonga emarweni lo begodu iragelo phambili kilomkhakha libuthaka.
Ekulwisaneni nalokhu, uThando Mahlangu, uSkhumba Masango kanye namakhulu wamaNdebele athatha isiqunto sokutjhagala e-Union Buildings ePitori kanye nemzimkhulu wehlangano yokurhatjha i-SABC, e-Auckland Park.
Nanyana iragelo-phambili libuthaka nje, umehluko ube khona eminyakeni embalwa edlulileko.
Lokhu kuza ngemva kobana isitetjhi sakamabonakude esikhamba phambili eSewula Afrika, i-SABC 1, sadlala umdlalo wokuthoma welimi lesiNdebele obizwa nge-Ikani, ngonyaka ka-2018. Lokhu kwaba yiqophamlando.
Iimbalobalo ezakhitjhwa yihlangano erhubhulula zokurhatjha i-South African Broadcast Research Council, yabika bona lihlangana namahlelo alisumi aphambili abukelwa khulu.
Unyaka ophelileko, i-Mzansi Magic yadlala omunye umdlalo wesiNdebele, i-Komkhulu. Amakhulu weenkulungwana awuthabela khulu.
Kokhunye, omunye wabatloli bomdlalo wakumabonakude olilungelunge, i-Scandal! esitetjhini sakamabonakude i-eTV, liNdebele.
Ibizo lakhe nguThemba Mahlangu ovela endaweni yaKwaMhlanga. Awukho umdlalo wakumabonakude olilungelunge osekela isiNdebele ukudlula wona.
Kukunje, omunye wabadlali abaphambili behlelo leli ngu-James Sithole begodu uzikhakhazisa khulu ngesikhethu.
UNGAFUNDA NALOKHU: Amakhalenda womrhatjho asadumile
Lokhu kukhombisa bona iintetjhi namahlelo wakamabonakude nazinganikela isiNdebele kanye namaNdebele ithuba lokuzibonakalisa, zingazuza okukhulu.
