Abavumi be-Maskandi abapheze badlula ephasini ngengozi yekoloyi ngepelaveke!
Umkhakha womvumo we-maskandi ulila ezimathosi. Pheze umkhakha lo ulahlekelwe bavumi abane be-Maskandi ngepelaveke ebuhlungu.
Umkhakha lo usalila ezimathosi ngokufa komdlali we-maskandi uScebi “Inkos’yamagcokama” Dlamini kanye nogida naye uGupta Mchunu.
Ngasikhathi sinye, abavumi ababili abathandwako nabo pheze badlula ephasini ngeengozi zeenkoloyi ezihlukeneko.
UQuality Biyela noStabilithi Mvubu bobabili baphunyuke ukufa ngeengozi zeenkoloyi ezitjhiyene ngama-iri ambalwa.
UQuality ube sengozini yekoloyi e-Empangeni ngoSondo, ngomhlaka 9 Rhoboyi 2026, endleleni eya ukuyokuvuma e-Mtubatuba.
NoStabilithi naye waba sengozini yekoloyi e-Ulundi ngoMvulo, ngomhlaka 10 Rhoboyi 2026. Kanti yena bekasendleleni ebuya emsebenzini wakhe wokuvuma.
UScebi nogida naye badlule ephasini ngamasa wangoSondo. Nabo bebayokuvuma e-Richards Bay lapho kwenzeke khona isehlakalo.
UStabilithi ovuma ingoma ye-Ama Push Ups utjele i-Daily Sun ukuthi usalinga ukuzwisisa bonyana uphunyuke njani ekufeni.
“ Bengitjhayela emehlelweni e-Ulundi ntambama nangizakulemuka ikoloyi egijimako iza ngqo ekoloyini ebegade ingaphambili kwami,” kwatjho uStabilithi.
“Ngemizuzwana nje, ikoloyi leyo yatjhayisana nale ebegade ingaphambili kwami bese yeza ngqo kimi.
“Ngabona ukuthi ngoba bengisemehlelweni , ngimi ozokulimala khulu nasingatjhayisana ubuso-nobuso.”
Uthi wajikisa msinya i-Toyota Fortuner yakhe waphuma endleleni. Ngemva kokuphuma endleleni, ikoloyi leyo yatjhayisa yami ngemuva ngamandla.
“Ngisazibuza nanje-nangabe akhange ngiphume endleleni ngabe ngisaphila? Ikoloyi yami ilimele khulu.”
UQuality Biyela oqeda ukukhipha i-EP yakhe i-Nizolala Nidakiwe begodu ovela nakuhlelo le-Amabhinca ku-Mzansi Magic naye uthokoza bonyana umphefumulo usahlangene nenyama.
Isthombe: Daily Sun
