Kufuze kukhulunye isiNdebele njalo ama-Ndebele nakalingisako?

Kukatelelekile bona abalingisi abama-Ndebele bakhulume IsiNdebele esitsengileko ngaso soke isikhathi nabalingisako? 

 Inani labalingisi abamaNdebele likhuphukile eminyakeni embalwa edlulileko. 

Kodwana lokhu akutjho bona bakhuluma isiNdebele namtjhana kobana basikhuluma ngaso soke isikhathi nabalingisako. 

 Kukhona abanye abadlala iindima la kukhulunywa khona amalimi ahlukahlukeneko afana nesiNgisi, isi-Tsotsitaal, njalonjalo. 

Abanye bayasikhuluma isiNdebele kodwana baqarha ngamanye amalimi. 

 Kanengi, umlingisi akazikhetheli ukukhuluma ilimi alifunako, kodwana uzwa ngabavezi, abatloli nabancophisi behlelo. 

 Amanye ama-Ndebele ayalila ngalokhu. Afisa ngathana abalingisi laba bangakhuluma IsiNdebele kwaphela begodu balinge ngamandlabo woke bona bakhulume esitsengileko. 

 Isibonelo sabalingisi abamaNdebele abakhuluma amalimi ahlukahlukeneko ngu-James Sithole odlala indima kaMdala emdlalweni olilungelunge i-Scandal! 

Ngikholelwa ekutheni abamphetheko bafuna aqarhe nesi-Tsotsitaal ekulingiseni kwakhe ngombana kukhambelana nendima ayidlalako. 

 USithole udlala indima njengesilelesi esikhulu begodu kanengi kuyaziwa bona iingebengu ezinengi zikhuluma isi-Tsotsitaal nanyana kungiliphi ilimi labo lekhabo. 

 Yinto ehle kobana sifuna ilimi lesiNdebele lithuthuke emkhakheni wokuzithabisa. 

Kodwana kufuze bona siyelele begodu sikhumbule bona kunemithetho neenkambiso ekorweni yokulingisa. 

UNGAFUNDA NALOKHU: Kusalilwa ngokubuyiselwa komrjatjho Ikwekwezi FM eJwanisbhege

Umlingisi akenzi ngokuthandwa kwakhe ngaso soke isikhathi.