U Samke uyeleliswe ngokuvikela u Methuli

Umfazi wesihlanu ka Musa Mseleku ungene edakeni ngemva kokuveza ividiyo yakhe nomtwana eenkundleni zokuthintana.

U Samke Khwela, usolelwe ngokubeka ipilo yomntwana wakhe u Methuli engozini.

Ividiyo le iveza u Samke abeke umntwana wakhe esihlalweni sangemuva ekoloyini ngaphandle kokobana ambophe esitulweni sekoloyi (sabentwana).

Ku Vidiyo le u Samke uhlezi kamnandi esitulweni esingeqadi kwesomtjhayeli.

Okubange iinkulumo ngobungozi abantu abakubonileko, kukobana umntwana ubotjhwe ngebhande le koloyi ingasi labentwana okwenza bonyana angavikeleli.

Abalandeli bakhe bakhombe into yokuthi ibhande lekoloyi kuphela alakalungeli abantwana abancani.

Bathi lingabangela nokulimala khulu begodu ngeke livikele umntwana nangabe ikoloyi iyajama nofana itjhayise.

Nanoma lokhu bekungasi kufaka ipilo yomntwana engozini ngehloso, kufanelekile bonyana abezali bahlale bacaphela izinto ezinje.Imibono eminengi iveziwe, abanye bakhuluma nokuthi u Samke bekufanele ahlale ngemuva nomntwana wakhe u Methuli.

Ukwenzela bonyana akwazi ukumutjheja kunokuthi athathe ama vidiyo awafake eenkundleni zokuthintana.

Umbuzo wokuthi kungani singekho isitulo sekoloyi sabentwana ngekoloyini njengoba u Mseleku anazo iinsiza nawo ubuziwe.

Lokhu kubange iinkulumo eenkundleni zokuthintana, ngemva kwakho koke okwenzakalo emndenini wakwa Mseleku okusemehlweni wabantu.

U Samke ubegade aphume nomndeni wakhe omncani, u Mseleku atjhayela begodu no Methule ahlezi ngemuva adla ilegere.