UEmtee uphume ngebheyili ngemva kokubotjhwa amahlandla amanengi

UMthembeni “Emtee” Ndevu uphume ejele ngemva kokuhlala amalanga ali-16 ngaphasi kokubotjhwa.

Ikhotho kaMarhastrada yeMidrand imnikeze ibheyili ye-R2 000, okwenze wabuyela ekhaya.

Ukuphuma kwakhe kulandele isiqunto somkakhe osele ahlukene naye, uNicole Chinsamy, sokubuyisela emuva icala lokumsola ngokuhlukumeza.

Ngokwemibiko, uChinsamy utjele ikhotho bona ubuyisele icala emuva (withdraw) “ngebanga labantwana.”

Bobabili banabantwana abathathu, begodu ukuhlukana kwabo sekube yindaba ekhulunywa khulu emphakathini.

Ukungezwani kwabo kuhlale kubonakala eenkundleni zokuthintana, okwenze indaba le ibenzima khulu.

FUNDA NALOKHU: https://ilangabinews.co.za/usydney-seethal-uveze-isehlakalo-sokukhuthuzwa-esamuqabangisa-ngokuphepha/

Ukubotjhwa kwamuva kwenzeke ngemva kokobana ibheyili yakhe yehliswe ngoRhoboyi.

Phambilini bekanikezwe ibheyili ngemva kokusolwa ngokuphula i-protection order ka-2023 efakwe nguChinsamy.

Umlayo lo umvimbela ukumthuka, ukumhlukumeza, namkha ukumbeka eenkundleni zokuthintana.

Ibheyili yakhe yehliswa godu ngemva kweensolo zokuthi uthumele imilayezo kuChinsamy nakukhona imibandela ethi bangathintani.

Lo kube ngewesibili unyaka abotjhwa ngendaba efanako.

NgoMngwengweni, uEmtee wabotjhwa ubusuku bunye, wakhitjhwa ngebheyili ye-R1 000, kwathiwa angakhulumi naye begodu angatjho litho ngaye eenkundleni zokuthintana. 

Nanyana kunjalo, ikululeko yakhe isabotjhelelwe emibandeleni eqinileko: kufanele alandele i-protection order, angathintani noChinsamy, begodu angamkhulumi eenkundleni zokuthintana.