Ukubuya kwe Rhythm City kuvusa imibuzo kubabukeli

Umdlalo we Rhythm City owapheliswa eminyakeni emihlanu edlulileko ku eTV ubuyile ku mabonakude.

Ababukeli bazokwazi ukuzikhumbuza ngeenkathi zakade begodu babone nezinye iincetjhana kanye nabalingisi ebenza bathande umdlalo lo.

Ngomhlaka 5 Mngwengweni 2026, u Jabulani MacDonald otlola ngeendaba za ku mabonakude ekhasini lakhe le X, ukuqinisekisile lokhu.

Utlole bonyana umdlalo lo ozokuvela ku channel 195 ku DSTV uthome khona ngomhlaka 5 ngo 11:20 am.

Kodwana omunye wabalandeli uphawule emtlolweni lo wathi yena uthome ukubukela umdlalo emvekeni ezimbili ezidlulileko.

Ababukeli be eTV baveze amazizo wabo ngalokhu.

“Abalingisi kumele babhadelwe ngokubuyiswa komdlalo wa ku mabonakude lo.

Akuzwisisakali bonyana kungani bangatholi i-cut yabo, ngoba imidlalo ephindwako yenza imali ehle,” kwatlola u __T_touch.

U @jikwana84228 yena uphawule wathi, “Ahhh ukubukela u Miles godu! Abalingisi kumele baphathwe ngehlonipho e Sewula Afrika, begodu ngiyakholwa bonyana singanikeza abalingisi bethu isthunzi.

Abalingisi kumele bathole ama-royalties ngomsebenzi wabo.”