Iphenyo ngokufa kukaAnele Tembe: uAKA ‘bekazitjela bonyana uyadlala’ ngaphambi kokuwa ePepperclub Hotel

Ama-iri wokugqina wepilo kaAnele Tembe ahlolisiswe eKhotho kaMarhastrada eKapa lokha nakuthoma iphenyo elisemthethweni ngokufa kwakhe.

U-Tembe bekaneminyaka ema-22 nakadlula ephasini ngomhlaka 11 Sihlabantangana 2021.

Isehlakalo lesi senzeke ngemva kokuwa emakhiweni omkhulu we-Pepperclub Hotel, lapho abegade ahlala khona nomkhwenyana wakhe, umvumi nom-repa ongasekho uKiernan “AKA” Forbes.

Iphenyo, elithome ngoMvulo ngomhlaka 7 Khukhulamungu 2026, lihloselwe ukuthola izimo ngokufa kwakhe nokuthola bonyana kukhona na iinzathu zokubophisa umuntu ngokomthetho.

Ihlelo lokuphenya umlando lo belihloselwe ukuthoma ngenyanga kaVelabahlinze.

Kodwana iphenyo lajanyiswa ngemva kokobana uMarhastrada (obekafanele abambe ikambiso yecala) angatholakali ngebanga lesimo esirhabako sokugula.

Abofakazi abasithandathu banikeze ubufakazi ngelanga lokuvula, kubalwa namapholisa amabili no-Robert Stefanutto, owathola u-Tembe ngemva kokuwa kwakhe.

Ipholisa elilodwa, okungakavunyelwa bonyana kubizwe ibizo lalo ngokulandela isinqunto seKhotho, litjele iKhotho bonyana lona nomsebenzi-kanye naye bathunyelwe ehotela ngemva kokuthola umbiko wokulinga ukuzibulala okusolwako.

Ekufikeni kwabo, bathola uTembe ahlubule e-Loop Street, lapho besizo elirhabako (paramedics) bebasele basiza khona.

Ipholisa langena ehotela ukuyokuthola ukuthi kwenzekeni.

Ekuthomeni ipholisa litjhingiswe ekumbeni 105, lapho athole khona uForbes kanye nabantu bakhe, esikhundleni sekumbi 104, lapho iinthandazi lezi bezihlala khona.

Ngokuya kobufakazi bepholisa, uForbes wamtjela bonyana yena noTembe bebaphikisana ekuseni ngelanga lelo begodu uTembe wamthusa ngokuthi uzoziphosa phasi ngesikhathi sokuphikisana kwabo.

Nanyana kunjalo, uForbes, othinte abonogada behotela, kuthiwa khange bakholwe bonyana uTembe bekahlose ukuziphosa phasi.

Ufakazi uveze bonyana uForbes bekakhuluma ngesehlakalo esidluleko esimayelana no-Tembe e-Durban Hilton Hotel ngomhlaka 11 Nobayeni 2020.

“Ungitjele bonyana bekaqabanga ukuthi uyadlala nje. Bekangekhe aziphose phasi ngombana ukuzamile lokho ngaphambilini eThekwini.

“Mhlawumbe bekaqabanga ukuthi kuzokufana nokwangaphambilini,” kwatjho ipholisa eKhotho.

Ipholisa lingezelele ngokuthi uForbes umazise bonyana amapholisa nabanye ababambe iqhaza babandakanyeke ngesikhathi sesigameko seThekwini, begodu uTembe ekugqineni akhange aziphose.

Funda indaba epheleleko ngesiNgisi: https://www.citizen.co.za/news/anele-tembe-death-inquest-aka/#google_vignette