UShebeshxt utjhiya umlayezo omangazako ku-instagram stories

Imizuzwana embadlwana uShebeshxt aqalene nentombi yakhe uKholofelo Chuene ibange iinkulumo eenkundleni zokuthintana.

Imifanekiso eyathathwa ekuveleni kom-rapper ekhotho ngomhlaka 10 Velabahlinze 2026 ikhombisa umvumi weLimpopo akhitjhwa ekhotho.

UShebeshxt wajama kancani ukulotjhisa uKholofelo obegade asukumile begodu abukele nabanye eenhlalweni zabantu abazokulalela icala.

Laba abababili akhange bakhulume okunengi, bavele batjhayisana ngezandla, baqalana ngemehlweni kancani bese uShebeshxt watjho akhamba.

Ividiyo efitjhazana le ibange iinkulumo khulu. Ababukeli bayo abanengi bazithole baqabanga ingasi ngesimo ababilaba abazithola kiso kuphela, kodwana nangendlela izenzo zakaShebeshxt zimotjhe izinto ngakhona.

ULehlogonolo Chauke (Shebeshxt), uvalelwe ejele pheze nakuphela unyaka ka-2025 emva kwesigameko esimbi sokudumuza.

Iinkinga zakhe zomthetho zinengi: uqalene namacala ama-20 woke. Amacala la afaka phakathi ukuzama ukubulala amahlandla amanengi, ubugebengu obunezimo ezinzima, ukuhlasela, kanye namacala amanengi ahlobene neenkhali zokudumuza.

I-Briefly News ibike ngaphambilini bonyana amacala wokubulala ngephutha kanye nokutjhayela budedengu, afakiwe ephepheni lamacala wakhe, lokho kwenza inani lifikile kuma-20.

Umvumi weLekompo ungene ekhasini lakhe le-Instagram (story) watlola umlayezo osukela engomeni yom-rapper weAmerica uYoung M.A engomeni yakhe ethi Still Free.

“I don’t have idols but rather rivals, ‘coz people who have titles always feel entitled. I only know survival, so be prepared for my arrival.”

Amagama awakhethileko engomeni le atjho okunengi ngesimo somvumi.

Ngokubonisa umcondo wokusinda kanye nokuqaphelisa abantu emkhakheni womvumi bonyana “nilungiselele ukufika kwami”, um-rapper lo uthumela umlayezo ozwakalako bonyana usawile kodwana uzozithintitha.