Usolelwa ngokujola nomvumi we Lekompo osesthenjini

Umvumi odume khulu we sfundeni se Limpopo, u King Monada uthole ithando godu.

U King Monada onabafazi ababili usolelwa ngokungena ebudlelwaneni nomunye umvumi we Lekompo.

Ngokuya kwemibiko, u Monada one ngoma ekulu i Ska Bora Moreki, uthole ithando emkhakheni womvumo begodu ‘ujola’ nomvumi osakhasako u DJ Ashante Theron Mashego.

U Monada ngu Khutso Steven Kgatle ibizo lakhe lamambala.

Ngokuya kwe Buzz Live News ubudlelwano babo bomsebenzi butjhugule baba ngebethando ngeskhatjhana esincani.

Abaphakathi emkhakheni lo baveze bonyana u Mashego akasapheli epilweni ka Monada.

Lokhu kuvela ngemva kweenyanga u Monada agqina ukuveza abafazi bakhe ababili ngo Tjhirhweni 2026.

Ama “hem hem” we thando lakhe no Mashego abange ukungazwani kuhle phakathi kwakhe nomunye wabafazi bakhe.

Abafazi baka Monada ngu Lerato Ramawela kanye no Cynthia Ntebatse oveze ukuba nenkinga nalokhu.

U King Monada kanye umvumi asolelwa ngokuzwana naye abakaphenduli eensolweni lezi namkha balandule ubudelwano babo eenkundleni zokuthintana.