2009-2023: Abafazi abasithandathu abathumba ihliziyo kaSupa Mega
Iindaba zamathando kaKiernan “AKA” Forbes ziphinde godu zaba yindaba-mlonyeni.
Zivuswa ngeskhathi lapho kuthoma iphenyo ngokufa kwakaAnele “Nellie” Tembe obegade athembisile bona uzamenza umkakhe ngaphambi kokobana bobabili bagqine sebadlula ephasini.
Ukuvela kabutjha kwezividiyo, imiyalezo kanye nokuhlehliswa kwephenyo ngokufa kwakaTembe kube ngikho okwenza abantu abanengi beSewula Afrikha bazibuze ngabafazi abakhe baba sepilweni yom-rapper uAKA.
Obunye babo ubudlelwano babikwa emaphephandabeni ngesikhathi uAKA asaphila. Ukusukela kumakoti wakhe wokuthoma ukuya kumfazi owajama naye ekugcineni, napa abantu ebangena ebudlelwaneni no AKA ngaphambilini:
Enhle Mbali Mlotshwa (2009-2010)
Ngokuya ngoTony Forbes, ubaba kaAKA, ubudlelwano bokuthoma bomvumi we-Fela In Versace bebuphakathi kwakhe noEnhle Mbali Mlotshwa.
DJ Zinhle (2012-2020)
UKiernan “AKA” Forbes wathoma ukuzwana noDJ Zinhle ngemva kokuthi bahlangane eBotswana. Ngo 2015, bamukela umntwana womntazana uKairo Owethu Forbes.
Kodwana akhange kuthathe iskhathi bonyana bahlukane ngombana kwathiwa uAKA wangena ebudlelwaneni noBonang Matheba, uDJ Zinhle akhona njalo.
Bonang Matheba (2015-2017)
Nanoma laba ababili baphika ubudlelwano babo ekuthomeni, baqinisekisa indaba le ngonyaka ka 2016. Kwathi ngo Nobayeni 2017, kwatjhabalala koke lokho.
Nicole Nyaba (2018)
Ngo 2018, uAKA wazwana no Nicole Nyaba, kodwana ubudlelwano babo akhange buye kude.
Ngonyaka ka 2022, uNyaba waveza ukuzisola ngokungena emathandweni noAKA, emcociswaneni wakhe noGigi Lamayne.
Wathi lokhu kwabanomthelela omumbi epilweni yakhe.
Anele “Nellie” Tembe (2020-2021)
Laba ababili bathoma ukuzwana ngo 2020, kwathi ngoMhlolanja 2021, uAKA wamemezela isthembiso somtjhado.
Ngemva kweenyanga ezimbili, uTembe wadlula ephasini ngemva kokuwa emakhiweni ophezulu we-Pepper Club Hotel, eCape Town.
Nadia Nakai (2021-2023)
Ngemva kokudlula ephasini kwakaTembe, uAKA wathola uthando godu kuNadia Nakai.
Laba ababili bahlukaniswa kukufa ngemva kokuthi uAKA abulawe ngokudunyuzwa ngaphandle kwendawo yokudla eDurban ngoMhlolanja 2023.
