Abantu beMzansi baseka uL’vovo ngemali, uDJ Tira ngomunye wabo

Abantu beMzansi baseke uL’vovo ngemali ngemva kokuthi avele eGagasi FM, akhuluma ngendlela eyathinta abantu iinhliziyo.

Abalandeli bakhe bavule iinkhwama zabo ukuze balekelele ngezemmali.

Abanye banikele ngemali encani njenge-R8, kodwana imali esele inikelwe besele ifike pheze ku-R90,000 ngesikhathi sokutlolwa kwendaba le.

Abantu bathintwa likhambo kanye nobunzima ahlangabezene nabo, bese babumbana ukuze bamseke ngeendleko ze-physiotherapy yakhe.

UMthokozisi Khathi (L’vovo), wahlaselwa yi-stroke ngonyaka ka 2022 begodu nobulwelwe beswigiri, okwenza bonyana agqine sele ehlile nemzimbeni.

Umcociswano wabo no Linda Sibiya ehlelweni le-Sunday Devotion kuGagasi FM, ubengesinye isinyathelo asithethe pepenene, kusukela athoma ikhambo lakhe lokululama.

Umvumi wengoma eyadumako ngaphambilini i-Bayangsukela akhange akwazi ukubamba imizwa yakhe nakaqala emuva kuzo zoke izimo adlule kizo nakulokho asadlula kikho.

FUNDA NALOKHU: https://ilangabinews.co.za/kunuka-ukutjha-esthenjini-sakampumelelo-mseleku/

“Ngizizwa ngibuhlungu ngombana ngiyazi lapho engibuya khona neentjhijilo engihlangabezene nazo.

“Angazi bonyana ngifike njani la, kodwana ithemba lami kuZimu lingivumele bonyana ngibe la namhlanje,” waveza.

Naye uDJ Tira nge-Afrotainment yakhe waba phakathi ubengomunye olekelela ngemali ebalelwa ku-R10 000.