Iqiniso liyavela u Msizi uzokubulawa

Umlingisi we House Of Zwide u Msizi odlalwa ngu Mduduzi Mabaso uzokubulawa umdlalo lo nawuphelako.

U Msizi wakwatisa ababukeli ngaphambilini nakazakubulala u Shoki Zwide obeka thandwa babukeli bomdlalo lo.

I eTV nayo yathusa abalandeli bayo ngo Ntlolanja 2026 nayiveza bonyana umdlalo we House Of Zwide nawo uzokupheliswa.

I TVSA ibike bonyana u Msizi uzokubulawa ngu Nkosi Zwide olingiswa ngu Wanda Zuma, ngomhlaka 26 enyangeni ezako nakuphetha umdlalo lo.

Ibangelo yalokho kuthola iqiniso lokobana nguye owabulala umfazi wakhe u Shoki Odlalwa ngu Shalate Zuma.

U Wanda Zuma no Shalate Zuma ( obegade angu Shekhabi isbongo ngaphambilini) bavela eenkundleni zokuthintana ngemva komtjhada wabo eempilweni zabo zamambala.

Isicephu esizokudlala ngo Mmvulo ngomhlaka 15 inyanga ezako, siveza bonyana u Isaac uhlele ukusebenzisa u Faith ukwembula okwenzekako mhlazana u Nkosi atjhayisa ngekoloyi.

Kuthi elangeni elilandelako, u Ona no Isaac baqalane no Faith ngokwenzekako engozini eyehlela u Nkosi no Shoki.

U Nkosi wehlelwa yingozi yekoloyi anomkakhe u Shoki ngo 2025.

Kuvele bonyana ngo Losithathu, u Faith Zwide, ongudadwabo ka Msizi uzokuvuma iinsolo zaka Isaac ngo Msizi.

U Faith uzokwenza into eyokuphula ithemba laka Msizi kuye.

Lokhu uyokwenza ngokugadangisa iphimbo laka Msizi avuma umlandu esicetjhaneni sango Losihlanu, kodwana u Msizi uzokuthola ngakho lokhu bese uyabaleka.

Ngokuya kwamalanga, iqiniso liyavela ngokwenzakalako, begodu iqiniso litjhugula izinto ngendlela embi emndenini.