Kugidingwa ubukghwari bukaDorhodere u-Esther Mahlangu

 Indawo yokucalisa zobukghwari, Iziko South African National Gallery, ihlonipha begodu igidinga umakekere womgwalo wesiNdebele uDorhodere u-Esther Mahlangu. 

Isihloko somcaliso sibizwa ngokuthi “Then I Knew I Was Good at Painting: Esther Mahlangu, A Retrospective.”

 Umnyanya lo ubanjelwe edorobheni le-Cape Town, esesifundeni seTjingalanga Kapa.

Uthoma mhlana amalanga alisumi nabunane ngenyanga kaMhlolanja enyakeni ophezulu begodu uzokuphela mhlana amalanga alisumi nanye enyangeni kaRhoboyi unyaka lo. 

 UMahlangu wathoma ikhambo lakhe njengomgwali amntazinyana oneminyaka elisumi. 

Ubika bona ummakhe nogogwakhe bamfundisa ukugwala bebambandula.  

Njenganje, sekaneminyaka edlula amasumi amahlanu ebizelweni lokugwala. 

 Okhunye okuzokubukiswa emcalisweni lo yikoloyi ye-BMW 525i — eqeda ukubuya kokuthoma eSewula Afrika ngemva kweminyaka emasumi amathathu ingaphetjheya kwamalwandle. 

Umgwali lo, wagwala ikokoyi le ngemibala ekhethekileko yesiNdebele. 

 UMahlangu ngumma wokuthoma kanye nomuntu wokuthoma ovela ngaphandle kwe-Amerikha nenarhakazini ye-Europe — owamenywa bona azozibandakanya ekukulegweni kwekoloyi yomgwalo. 

UNGAFUNDA NALOKHU: Ikwekwezi FM ihlele umnyanya omkhulu wokugidinga isikhethu

Nakuphela umcaliso lo, ikhambo lekulego lobukghwari lizokuraga liye eJwanisbhege kanye nenarheni ye-Amerikha.