Kuhlotjaniswa indima ka “Jonas” namadoda aziwako eMzansi

Iinkundla zokuthintana e-Mzansi zitjhisa bhe ngomdlalo omutjha waku-Netflix, i The Polygamist.

Njengoba isibalo sababukeli bomdlalo sikhuphuka ngamandla, kuhlotjaniswa indima ka “Jonas” namadoda amanengi eMzansi.

U Mtshali, odlala indima ka “Jonas” ukwazile ukuveza uburhamaru babantu bembaji abanganelisekiko ngomfazi munye.

Nanokuthi eskhathini esinengi ibangelo kukuba nemali enengi, kodwana kwesinye isikhathi abantu bembaji abenziswa yimali kuphela.

Indima ka “Jonas” irhabhudle abantu abanengi, abanye ibakhumbuza ngalokho ebadlula kikho, abanye yabavezela iqiniso ngobuhlungu abantu abaseduze nabo badluke kibo.

Kodwana akhange kuthathe iskhathi ngaphambi kokobana bahlobanise indima le no Zola Ntshangase.

U Zola begade atjhade no Nozipho Ntshangase owaziwa ngehlelo le Mommy Club ngaphambilini. Iindaba zabo zagqwala eenkundleni zokuthintana.

Lokhu kwabonakala mhlazana kuvela ividiyo etjengisa u Zola athuka umama osebenza ekhayeni labo, umfazi kanye nabentwana bakhe ngokumvinba bonyana aphume.

Ngemvanyana kwalokho kwatholakala bonyana sele azwana nomtazinyana omncani begodu bagqina batjhada.