Ababili kwabathathu elutjheni abakwazi ukuthola imisebenzi

Ifundo yenza umehluko omkhulu, njengoba izinga lokungasebenzi liphezulu khulu kubantu abangakaqedi ibanga letjhumi nambili.

Ikinga yemisebenzi eSewula Afrikha ithinta khulu abantu abatjha, njengoba pheze ababili kwabathathu bangawutholi umsebenzi.

Imininingwana emitjha evela kwa-Statistics South Africa ikhombisa ukuthi isibalo sabantu abatjha abangasebenzi sikhuphuke safinyelela pheze ku-63% ngesikhathi sekotara yesibili ka-2026.

Isazi sezomnotho sakwa-Investec, uLara Hodes, sihlathulule leli zinga ngokuthi liphezulu khulu ngendlela etshwenyako.

Ikinga le ayigcini kubantu abatjha kuphela. 

Izinga lokungasebenzi eSewula Afrikha seliloke likhuphuke lafinyelela ku-33.6% phakathi kwenyanga kaSihlabantangana noMngwengweni, lisuka ku-32.7% eenyangeni ezintathu zokuthoma zonyaka.

Isibalo sabantu abangasebenzi sikhuphuke ngabantu abama-345,000 safinyelela eengidini ezili-8.5 (million).

Ngesikhathi esifanako, isibalo sabantu ebegade baqatjhiwe eenyangeni ezintathu ezidlulileko sehle ngabantu abazi-16,000.

Kodwana ngemva kweembalo lezi zokungasebenzi, kukhona enye ikinga ekulu: ifundo namakghono.

Abantu abaphuma esikolweni bangakaqedi iimfundo zabo zebanga letjhumi nambili (grade 12), baqalana nobunzima obukhulu khulu ekutholeni imisebenzi.

Pheze i-39% yabantu abangakaqedi iimfundo zabo zebanga letjhumi abasebenzi.

Phakathi kwabantu abaneziqu zeUnivesithi, izinga leli liphasi khulu, lijame pheze ku-12%.

UHodes uthe ukuthola ifundo kusabalulekile ekusizeni abantu ukuthi bathole imisebenzi.

FUNDA NALOKHU: https://ilangabinews.co.za/ikusasa-le-cape-times-lisemnyameni-ngemva-kokobana-isekunjalo-ijamise-ukweseka-ngeemali/

Kodwana isazi sezomnotho uJohann Els wakwa-PSG sikholelwa bonyana ikinga ijule khulu kunalokho.

Uthe iSewula Afrikha Afrika ayinabo abantu abaneleko abanamakghono afunwa baqatjhi.

“Asinawo amakghono esiwafunako,” kwatjho uEls.

“Eqinisweni asakenzi litho ngehlelo lezefundo eminyakeni ema-30 edlulileko ukulungisa ukutjhoda kwamakghono.”

Iinkinga ehlelweni lefundo zathoma isikhathi eside ngaphambi kokobana ilutjha lithome ukufuna imisebenzi.

Irhubhululo lokufunda leenarha ngeenarha lithole bonyana abafundi beSewula Afrikha bebanga 4 bathole imitlomelo engaphasi khulu kwesilinganiso somhlaba woke.

Ukusebenza kwenarha yeSewula Afrikha embalweni nakusayensi nakho kubuthakathaka nakufaniswa neendingo zomhlaba woke.

Ngaphandle kwefundo, ukufundiswa ngomsebenzi namkha ulwazi lomsebenzi- ilutjha lingakuthola kubudisi khulu ukuthuthukisa amakghono afunekako ukungena emakethe yemisebenzi.

Funda indaba ngelimi lesingisi: https://scrolla.africa/two-in-three-young-south-africans-cannot-find-jobs/