U Nkululeko Mahlangu ubopha ifindo nomkakhe

U Nkululeko Mahlangu owaziwa khulu ehlelweni le Married at First Sight SA kumabonakude uqinisekise umendo wakhe kanye nobudlelwano bakhe.

U Mahlangu utjengise iinthombe zakhe zama lobolo nomkakhe omutjha u Tshegofatso Moeketsi eenkundleni zokuthintana.

Lokhu kuza emva kokobana uMahlangu abeke iinthombe zabo eenkundleni zamalobolo ngemva kokuzwana iinyanga ezimbalwa. UMahlangu ngomunye walabo ebangenelela ihlelo lokutjhadiswa ku mabonakude.

Ababukeli behlelo leli kulapho bambona khona atjhadiswa no Makoto Phamodi. Kodwana ubudlelwano babo baphela ngemva kokobana ihlelo la kumabonakude liphele.

Imibono yabalandeli behlelo leli I Married at First Sight SA season 2 iveze amazizo wabantu ahlukahlukeneko.

Abanye bebasolela ukuthi uMahlangu usebenzisa ubudlelwano bakhe nomuntu wakhe omutjha ukuqinisekisa iphuzu lakhe ku Makoto Phamodi. Kodwana ziinsolo kuphela, ingasi iqiniso.

Enyangeni yetjhumi enyakeni ophelileko, uMahlangu waveza bonyana wahlangana nomkakhe nababelethi bakhe.Lokhu kwenzeka ngaphambi kokobana avele kumabonakude.

Ngaleso isikhathi bebangasi sebudlelwaneni begodu uMahlangu bekabeke ihliziyo yakhe ekutholeni umfazi ehlweleni le MAFS SA kuphela.

U Mahlangu nguye wesibi otjhade ngendlela yesintu, emva kwaka Khumo Ngobeni no Thabang Mvuyane abavela ehlelweni elifanako.

Kodwana okuhlukileko ngaye kukuthi akhange atjhade nomuntu ahlanganiswe naye ehlelweni le MAFS SA.

“Nkululeko we Married at First Sight SA ukhiphele umuntu wakhe amalobolo ngemva kweenyanga ezimbalwa bazwana. Ngiyabathokozisa, yena nomkakhe,” kwatjho u Bafana Mthembu owaziwa khulu ku X (Twitter).