U Pearl Thusi uvule isfuba ngokungafuni umtjhado

U Pearl Thusi uvule isfuba ngesiqunto sakhe sokungafuni umtjhado.

Iinzathu zakhe uziveze emqoqiswaneni wakhe no Nandi Madida ku Motherhood Network channel evela ku Youtube. 

U Thusi uveze bonyana amazizo wakhe ngomtjhado avela ezintweni ezamehlakalelako ebuncanini bakhe.

Nanoma u Thusi abesemehlweni wabantu abanengi, kodwana iindaba zamathando akazivezi pepenene.

Eminye imijolo yakhe yangaphambilini idose amehlo wabantu kodwana kiyo imijolo leyo, awukho ophelele ngomtjhado.

Uthi ibangelo yalokhu akusikho abantu angena nabo ebudlelwaneni kodwana kungebanga langendlela yena aqala ithando ngokuphelela kwalo.

Okumangazako kukobana u Thusi uveze bonyana utshwaya ubabakhe iphoso ngokubhubha kuka mamakhe.

Okhunye akuvezileko kukuthi umamakhe obegade ayi-nurse begodu aphila nange-HIV bekathwele kanzima.

Uthi bekanakekela yena nabentwana bekhabo ababili, anakekela iingulani begodu arhodlelele neentjhijilo zemtjhadweni.

“Ubabami bekahlukumeza umamami.

Nanoma kukungathembakali, namkha ukuba naye ngekoloyini phakathi kobusuku ngombana bekaqabanga bonyana [umma] kukhona ebegade aphezukwakho.

Bekamthatha amuse phakathi kwesganga amkhombe ngesigidi,” kwatjho u Pearl Thusi.

U Thusi uvumile bonyana ubudlelwano bakhe no babakhe buhlanga-hlangene kodwana usamthanda njengo baba.