UDJ Tira ugidinge iminyaka ema-50 ngomlayezo othinte iinhliziyo

UDJ Tira, ugidinge unyaka wakhe wama-50 ngomhlaka 24 Rhoboyi ngokuzithoba nangokuthokoza okukhulu.

Uveze bona uthintwe lithando elikhulu alitholileko kubalandeli, abangani, umndeni kanye nabanye abasebenza emkhakheni kwezokuzithabisa.

Umkhosi lo awukabi nje lilanga lokubelethwa, kodwana ubesikhathi sokubuyekeza indlela yakhe ede emvumeni.

UDJ Tira, onguMthokozisi Khathi, ibizo lakhe lamambala, uthathwa njengomunye wabantu abenze umehluko omkhulu ekukhuleni komvumo we-Qqom kanye nomkhakha wokugida weSewula Afrikha yoke.

FUNDA NALOKHU: https://ilangabinews.co.za/i-gagazi-fm-inyakazisa-umrhatjho-ngamatjhuguluko-amatjha/

Ukufikelela eminyakeni ema-50 kusibusiso esikhulu, khulukhulu kumuntu osebenze ngokuthembeka iminyaka eminengi emkhakheni onokuphalisana okukhulu.

Ngaphandle kokuba yiDJ nomkhiqizi womvumo, uzakhile njengebhizinisi eliqinileko njengomnikazi welabuli i-Afrotainment.

Ngaphasi kwaleli bizo, unikele amathuba kubavumi abanengi, wasiza nokwakha imisebenzi yabanye babavumi abadumileko enarheni.

Lokho kuveza bona indima yakhe ayipheleli epulatifomini, kodwana idlulela ekukhuliseni amarhono amatjha.

Ngesikhathi imilayezo yokumhalalisela igcwala eenkundleni zokuthintana, uDJ Tira uphendule ngomyalezo olula kodwana onamandla: “Ngiyanithokoza ngeemfiso zenu zelanga lami lokubelethwa.”

Amazwi lawo atjengise ukuthokoza kweqiniso kanye nobudlelwano obuqinileko phakathi kwakhe nabalandeli mihla namalanga.

Umsebenzi kaDJ Tira usabalala ezizukulwaneni ezihlukahlukeneko, begodu ulokhu azivumelanisa nokutjhuguluka komvumo.

Ukugidinga kwakhe iminyaka ema-50 kutshwaya okungaphezu komnyaka wokubelethwa.

Kutshwaya amatjhumi weminyaka womthelela, uburholi, nokuthembeka emkhakheni womvumo weSewula Afrikha.