ULimpopo Boy uphika ukusulwa kwe-World Tour 10
UMatome Robert Mahlatse ozenzele igama ngokugida enarheni yeSewula Afrikha nangaphetjheya uqinisekisile bonyana i-World Tour 10 isaqhubeka.
UMatome Robert Mahlatse owaziwa ngebizo lakaLimpopo Boy uqinisekisa lokhu ngemva kwamahem-hem wokuthi ulobe iseko, nakuzakuvela iindaba zakhe zokuzeba nomfazi otjhadileko eenkundleni zokuthintana.
Ngaphambilini, kube namabatjho wokobana iinhlelo ebezenziweko njengenjwayelo zokuyokugida zisuliwe ngemva kokuthi kurhatjheke ividiyo yakhe noMatshidiso Matilda ngasese bazeba.
Ukurhatjheka kwevidiyo le kukatelele uLimpopo Boy bonyana aqolise kubalandeli kanye nakwabanye abantu abathintekileko esehlakalweni lesi.
Esitatimendeni sakhe sokuqolisa, uthe, “Ngithole ngemva kokurhatjheka kwevidiyo bonyana bekatjhadile. Bekumele ngiqinisekise isimo sakhe somtjhado ngaphambi kokobana ngingene naye emsemeni. Ngalokho, ngiyaqolisa,” kwaveza uLimpopo Boy.
“Ngifuna ukuqolisa emndenini wakwaShai ngobuhlungu obukhulu engibafake kibo. Angikakhuliswa ngaleyo ndlela. Angiphuli imizi yabantu.”
Ilwazi lamvanje liveza bonyana i-World Tour 10 isaragela phambili ngaphetjheya unyaka lo.
Imibiko erhatjheke eenkundleni zokuthintana iqinisekise bonyana uzokwenza adume ngakho eSwitzerland ngoSewula 2026, bese kulandele nge-Russia ngoNobayeni 2026.
