UThatohatsi uthi uKabza noPhori bamfundise ukuqina ihliziyo

Ikanyezi ye-amapiano uThatohatsi (22), uthi ukusebenza noKabza de Small kanye noDJ Maphorisa kumenze waqina ihliziyo.

UThatohatsi, onguThato Raphadi ibizo lakhe lamambala, uthe ukusebenza nabo kumfundise ukuba nesineke, anganaki iinkulumo ezimbi eenkundleni zokuthintana begodu nokuqalana nokwenza umvumo wabalandeli bakhe kuphela. 

Umvumi lo, owaziwa ngeengoma ezifana ne-Izospana, Ama hem hem kanye ne-Injabulo, ulungiselela ukuvuma ku-Scorpion Kings Live concert elindelwe ngamehlo abovu eFNB Stadium eJwanasbhegi.

“Ngithabe khulu. Kulithabo kimi ukuba yingcenye yento ekulu ngalendlela, begodu angikwazi ukulinda ukuvumela boke abantu,” kwatjho uThatohatsi.

UThatohatsi uveze bonyana ngaphandle kokwenza umvumo ndawonye, uKabza  noPhori, bamfundise okunengi okubumbe ibizelo lakhe lezomvumo.

“Bangitjele bonyana abantu bazokuhlala bakhuluma begodu kumele ngingabanaki, ngibemfazi oqinileko.

“Batjho nokuthi nangabe ngivumela izinto ezimbi ezikhulunywa ngami zingithinte emoyeni, umvumo wami uzokutjhabalala.”

Waragela phambili wathi, “Bangifundise indlela yokusebenza ngokuzikhandla, nginikeze ngeskhathi nethando eengomeni zami.”