UThinah Zungu uthi ngekhe alise ukuzibetha isfuba nge’stezi’

Umvumi we-Gospel uthi angekhe nangelanga lomhlolo alise ukugidinga ipumelelo yakhe eenkundleni zokuthintana. 

UThinah Zungu (38), uthe le yindlela yakhe yokudumisa uZimu nokunikeza abanye abantu ithemba.

UThinah Zungu, ovela nehlelweni lepilo yakhe yamambala i-Thina singoZungu, uhlezi abelana ngepilo yomndeni wakhe eenkundleni zokuthintana. 

Izinto abelana ngazo kubalwa indlu yakhe kanokutjho (double storey), kanye nedamu lokubhukuda.

Kodwana uthe lokhu akakwenzi ngehloso yokuhlekisa ngalabo abanganalitho.

“Ihloso yami akusiyo yokutjela abantu bonyana sengiphumelele nofana ngicebile lokha nangizibetha isfuba ngendlu yami eneentezi ezimbili nedamu lokubhukuda. Abantu bakuthatha kumbi lokhu.

“Baqabanga bonyana ngihlekisa ngabantu abatlhogako nofana labo abahlala emikhukhwini. 

“Angitjho njalo. Ngitjho ukudumisa uZimu nokunikeza abanye ithemba lokuthi isikhathi sabo siyeza. Ngigidinga ukukhuthaza,” kwatjho uThinah.

UThinah uthi ikhambo lakhe khange libe lula, wakhumbula ukwaliwa mabhanga amanengi ngesikhathi alinga ukuthola imali yokuthenga namkha ukwakha indlu yakhe.

Ekugqineni, wakhetha ukonga lokho angakwazi ukukonga wathoma ukwakha indlu ekhabo e-Inanda, eThekwini.

UThinah uvumile bonyana ipilo yakhe ayihlali ibuthebelele nokuthi ezinye iinqunto zimlahlekelise ngabangani namathuba webhizinisi.

Ubuye godu wathi wasolelwa ngokuthwala ngesikhathu angumngani wenyanga edumileko.

Uthi kwenza abanye abantu badlalele kude naye okwenze bonyana alahlekelwe mathuba webhizinisi yomvumo.

“Ngekhe ngalisa ukudumisa uZimu naphezu kweentjhijilo. Lokho kutjho bona ngekhe ngalisa ukuzibetha isfuba ngendlu yami nedamu lokubhukuda,” watjho.