Akazisoli ngokutjhisa umuzi wekhabo u Gontse Makhene

U Gontse Makhene ongu dadwabo ka Latoya Makhene omncani ufake umndeni wakhe ekingeni.

Lokhu kuvele ehlelweni labo la kumabonakude eliveza iimpilo zabo zamambala elibizwa ngokuthi yi The Makhene.

Ehlelweni leli elithandwa khulu babukeli, kuvele bonyana u Gontse pheze watjhisa umuzi obekade unomndeni wakwa Makhene waphenduka waba mulotha.

Into ekhulumise abantu khulu eenkundleni zokuthintana yipendulo u Gontse abe nayo ngesehlakalo lesi esithusako.

Esicephini sabo samuva nje, u Latoya uveze bonyana udadwabo omncani upheze watjhisa umuzi wekhabo.

Ngokuya ngo Gontse, utjhise umatrasi bese pheze ikotara yomuzi wekhabo yabamba umlilo.

Lento uyijike yangathi yinto encani ngokuhleka kwakhe nakaveza bonyana kwenzakaleni ngalelo ilanga.

Wathi akhange azitjele bonyana bangayenza indaba ekulu nanamhlanje ngemva kwesikhathi esele sidlulile.

“Kuze kube nanamhlanje, abakwazi ukuyidlulisa. Ngiyafunga ku Zimu, bengingatjho bonyana kuzakuba yinto ekulu,” kwatjho u Gontse Makhene ehlweleni le The Makhenes.

Umndeni wakhe wazisusa kuye ngemva kwalesi isehlakalo nanoma kungekho ihlathululo lokobana khuyini okwenza bonyana atjhisa umatrasi.

Eencephini zaphambili kwaba khona indaba yokuthi u Gontse uthatha iindakamizwa. Umndeni wakhe bewungazi bonyana ungamsiza njani.