Amakhalenda womrhatjho asadumile

Eminyakeni eminengi eyadlulako, abalaleli abanengi bebalalela umrhatjhi bangazi ukuthi ucaleka njani. 

Lokhu kungombana umrhatjho uzwakalisa iphimbo kwaphela — awuvezi ubuso namtjhana umzimba womuntu. 

 Kodwana kwafika isikhathi la kuba khona amakhalenda womrhatjho aveza ubuso namtjhana umzimba woke wabarhatjhi. 

Abantu abanengi nje sebayazi bona umrhatjhi othile ucaleka njani. Abanye bayacala bona indlela azwakala ngayo ikhambelana nendlela acaleka ngayo na. 

Soloko kwafika iinkundla zokuthintana, abanye bakghona ukuthola lula bona abarhatjhi abathile bacaleka njani ngombana baveza iinthombe zabo kizo. 

 Abanye bayazibuza bona kusatlhogeka bona imirhatjho ikhiphe amakhalenda esikhathini sanje na. 

Babuza ngombana sekwaba lula ebantwini abanye ukubona abarhatjhi.

 Ngokuya ngombono wami, kusatlhogeka bona amakhalenda wemirhatjho akhitjhwe. 

Lokhu kungombana abanye abantu abangeni eenkundleni zokuthintana begodu abanye abakghoni ukuzisebenzisa. 

Kufaka hlangana abantu abadala nalaba abangakafundi ukuyaphi. 

 Imirhatjho eminye seyiwakhuphile amakhalenda wayo. Kubalwa hlangana Ikwekwezi FM, Ukhozi FM, i-Motsweding FM kanye ne-Umhlobo Wenene FM. 

 Ikwekwezi FM ivakatjhele iindawo ezithile isabalalisa ngamakhalenda wayo. Kubalwa hlangana i-KwaMhlanga, i-Kwaggafontein, i-Siyabuswa, i-Matjhirini, i-Middleburg ne-Midrand. Amakhalenda la akathengiswa. Atholakala smahla.