Imali etholwe balingisi be The Polygamist iveziwe

Ividiyo esatjalaliswe ngu @thatmzansigirl ku Threads, iveza ihlathululo bonyana yimalini umlingisi ngamunye omkhulu ayitholileko ngomsebenzi wakhe ku The Polygamist. 

Ngokwevidiyo efitjhani le, kuthiwa umlingisi omkhulu u Sdumo Mtshali, odlala indima ka Jonasi Gomora uthole i-R1.4 million. 

U Celeste Ntuli (u Essie) no Kenneth Nkosi ngamunye kuthiwa bathole i R700 000, kanti uSthandiwe Kgoroge yena kuthiwa uthole R600 000.

Isikhathi sokuphuma kwevidiyo le, sibe sihle khulu ngombana i The Polygamist kungumdlalo osele ubukelwa khulu ku Netflix, ingasi e Mzansi kuphela kodwana nakwezinye iinarha.

FUNDA NALOKHU: https://ilangabinews.co.za/u-taraji-p-henson-ubukela-i-the-polygamist-ku-netflix-ngelanga-linye/

Umdlalo lo ulandela uJonasi Gomora ongusomarhwebo, ipilo yakhe yamanga, nokusebenzisa imali ukuthola amandla. 

Indima le iveza imiphumela yokungathembeki, ubuhlungu obudluliselwa eenzukulwaneni, abobaba abangekho empilweni zabentwana babo, nokugandeleleka emendweni ukugqina isithombe somndeni opheleleko phambi kwabantu. 

Ukubaluleka komdlalo lo kuthinte iinhliziyo zababukeli, kwaze kwaba nokuphikisana kuma-WhatsApp groups, ku-X, nakuma-forums eenkundleni zokuthintana.