Umkhakha womvumo weLekompo uhlanganyele emthandazweni

Umkhakha womvumo weLekompo uhlangene eLimpopo emthandazweni omkhulu.

Lokhu kulandela iingozi ezimasikizi eselezithathe imiphefumulo yabavumi abanengi beLekompo begodu yatjhiya abanye balimele khulu eminyakeni edlulileko.

Abavumi, abathintekako emkhakheni kanye namalunga womphakathi bahlangene ukuhlonipha labo ababhubha ngengozi zeenkoyi.

Begodu bathandazela nokuphepha kwabavumi abahlala ama-iri amanengi bayaphasi naphezulu eendleleni. 

Umhlangano wokuthandaza uvuselele ukutlhogeka  kwezimo eziphephileko zokukhamba begodu nokuqaphela ubungozi abavumi abadlula kiwo eendleleni.

Umthandazo lo unikeze abavumi bomkhakha weLekompo ithuba lokuthi balile begodu basekane ngemva kwesikhathi esibuhlungu emkhakheni lo.

FUNDA NALOKHU: https://ilangabinews.co.za/u-kharishma-uyalulama-emveni-kwengozi-emasikizi-yekoloyi/

Umfundisi obegade arhola umthandazo, uReverend Awedzani Nemawukwe ukhuthaze abavumi bonyana babeke ithemba labo kuSomnini.

“Ngifuna nje ukuthokoza kubo boke abavumi ngokuza. Siyakholwa ukuthi uNkulunkulu uzosivikela. 

Sikhuthaza abavumi bonyana baqashe abatjhayeli begodu banciphise ukuthatha ama’bookings’ amanengi ngobusuku bunye.”