Unogada weJwanasbhege uthola i-BMW ngemva kwehlazo

Unogada we-Jwanasbhege owahlazwa phambi kwabantu, watjelwa nokuthi ngeke athenge i-BMW, sele aphiwe ikoloyi ebekuthiwe ngeke ayithole.

Indaba ekhuthazako kaTeboho Kabayi sikhumbuzo sokuthi ubuntu nokuzinikela emsebenzini wakho kungahlula ihlazo.

UKabayi oneminyaka ema-27, usebenza njengonogada e-BMW dealership eKempton Park. 

Indaba yakhe yarhatjheka ngoVelahlinze 2026, ngemva kokuthi i-vidiyo yakhe isatjalaliswe njengoba bekathukwa ngamezwi lapho azenzela umsebenzi wakhe.

Isigameko lesi senzeka lapho uKabayi atjhidela emadodeni amabili angena e-dealership walandela imithetho yokuvikela ngokubuza ukuthi baya kimuphi uMnyango (Department) nokubawa ukuhlolisisa amaphepha wokutjhayela.

Esikhundleni sokusebenzisana, umtjhayeli wamthuka, azikhukhumeza ngelokuthi  uyi-“millionaire”. 

Watjho godu nokuthi uKabayi u-“cheap” begodu ngeke avuke ayithengile i-BMW namkha atjhayele ikoloyi ekungeyakhe ngitjho noma angasebenza kangangani. 

Nanyana kunjalo, uKabayi waragela phambili nokubarhelebha ngekulu ihlonipho.

Abantu be-Glen On Cars community ngamva bahlanganisa imali ebalelwa ku-R31,900 ukuseka uKabayi. 

Wathi uhlela ukusebenzisa imali enye ukufezekisa ibhudango lakhe lokuvula i-bakery, begodu enye uzokunikela ngayo kubantu abasogolako.

Bese ikhampani ye-cybersecurity ne-security edidiyelweko i-ScaryByte yanikela ngekoloyi etja ye-BMW 1 Series kuye.

Ikhampani yamunikeza ne-cheque ye-R30,000 ukumurhelebha ngeendleko zekoloyi nokuseka ibhizinisi lakhe le-bakery.

Ikhampani ye-ScaryByte yatlola eenkundleni zokuthintana yathi: “Omunye umuntu uthe ngekhe akwazi ukuthenga i-BMW. Manje sekanayo!”