Abavumi abane abasebenze noTyla ku-albhamu yakhe etja

Umvumi uTyla Laura Seethal ukhiphe i-albhamu ebegade ilindwe isikhathi eside ebizwa ngokuthi A*POP.

I-albhamu yakhe eneengoma ezili-14, ikhitjhwe ngoLosihlanu begodu inabavumi beSewula Afrikha abanjengoLiquideep, MaWhoo, noBabalwa M, kanye nekanyezi ye-pop yeSweden uZara Larsson. 

I-albhamu le ihlanganisa isitayela sakaTyla ayedwa se-pop kanye ne-amapiano.

UTyla owathumba i-Grammy Award yindaba-mlonyeni emhlabeni-mazombe soloko kukhitjhwe i-albhamu yakhe, wafika endaweni yokuthoma ku-X ( Twitter) eSewula Afrikha kungakapheli ngitjho nesikhathi esinengi.

Emcociswaneni wakhe ne-podcast ebizwa ngokuthi yi-Big Boy TV enarheni yeAmerica, uTyla uhlathulule wathi i”A-pop” itjho ukuthi “African pop”.

“Ngizwa ngathi umvumo engiwenzako kunzima ukuwufaka ehlobeni elilodwa lomvumo ngombana ngihlanganisa izinto ezinengi ezihlukeneko,” watjho.

“Ekukhuleni kwami, akhange ngikhuthazwe yi-Afrikha kuphela kodwa nezinye iinarha emhlabeni, begodu bengihlezi nginetjisakalelo yokuletha koke lokho kumvumo wami. 

Ngibona ngathi i-A-pop yindlela etja yokubona umvumo we-Afrikha.”

Enye yezinto uTyla afuna ukuzenza kutjhugulula imibono namkha indlela abantu  emhlabeni-jikelele babona ngayo umvumo weAfrikha.

Umvumo weAfrikha uyatjhuguluka, begodu ngekhe uhlale uzwakala njenge ‘The Lion King'”, kwatjho uTyla. 

“Abantu balindele bonyana uzwakale ngendlela ethize namkha ubemvumi weAfrikha, kodwana lokhu kutjho ukuthini esikhathini sanje? Mina ngiletha i-‘A’ ku-pop, kunanoma yini engiyenzako.”