UZolani Tete ubulawe ngehloso

UmBuso uveze ekhotho yeMdantsane bona ukubulawa komdlali we-boxing owaziwako, uZolani Tete, bekungasi yingozi kodwana bekulihleliwe.

Ngokutjho komTjhutjhisi, uUzuzole Goqwana (22) nguye osolwa njengomuntu owahlela ukubulawa kwakhe, kwathi uSinebongo Qase (28) waba ngophakathi owafuna ababulali ababili.

Labo ababili, uSiphesihle Kolisa (28) no-Athandwa Gangala (27), kuthiwa ngibo abaqatjhiweko ukobana babulale uTete.

FUNDA NALOKHU: https://ilangabinews.co.za/ukhuzani-ubiza-ukuqedelwa-kwendlu-kascebi/

UTete, oneminyaka ema-38, wadumuzelwa ngaphandle kwesango lakhe e-NU17 eMdantsane ngoLosihlanu ntambama ngeskhathi alindele ukuvulwa kwesango.

Wazama ukungena ngaphakathi komuzi ngemva kwesehlakalo ukuze asinde, kodwana wahlongakalela lapho.

Intombi yakhe eneminyaka ema-27 yona yadunyuzwa kanengi begodu isesibhedlela.

ULuxolo Tyali weNPA uthe: “UmBuso uthi ukubulala bekucocwe kusese phambili begodu indaba le iwela ngaphasi kweSheduli 6 yoMthetho weNqubo yezobuGebengu.

“Ngebanga lobudisi bamacala, umTjhutjhisi uzokuphikisa ngamandla ukukhutjhwa ngebheyili.”

Lokhu kutjho bona abasolwa kuzokufuneka batjengise ubujamo obungakajayeleki ukuze bakhululwe.

UGoqwana ubanjwe ngoMgqibelo, uKolisa noGangala babanjwa ngoSondarha eScenery Park eKuGompo City, kwathi uQase wabanjwa ngoMvulo.

Amapholisa athole neengidi namabhuleti.

UKolisa noGangala sele bavele phambi kwekhotho yeKuGompo ngamacala wokuba neengidi namabhuleti ngokungekho emthethweni begodu balisile ukufaka isibawo sebheyili.

UTete, owakhulela eMdantsane abizwa ngo “Last Born”, wathumba ibhande lakhe lephasi lokuthoma ngo-2014 eKobe adlula uTeiru Kinoshita, wabuya waba yikutani yamabhande amabili ngo-2017 nge-WBO bantamweight.

Uphinde wabeka irekhodi le-Guinness lokuwisa ngesekhondi elili-11 adlula uSiboniso Gonya eBelfast.

Umndenakhe neBoxing SA bathe kuzokuba nesikhumbuzo e-Orient Theatre eKuGompo City ngoLosithathu, bese umngcwabo ube seMdantsane ngoMgqibelo.