USminofu uzithola ngaphakathi kwamafutha atjhisako neKosi yestjhaba samaZulu
Umvumi we-Maskandi uMphile “Sminofu” Gumede uzithole ngaphakathi kwamafutha atjhisako neNdlu yeKosi yestjhaba samaZulu emva kokukhipha ingoma ethinta isihlalo seKosi.
Ingoma yakhe etja ethi Emachobeni, ekhitjhwe ngoLosihlanu, ngomhlaka 24 Velabahlinze 2026, ikhalinyiwe emzini weKosi wabizwa ngokusemthethweni bonyana aziveze.
Emachobeni ngiwo uMuzi weKosi yakaNdlovukazi uNomzamo Myeni, efunyanwa eJozini, esfundeni seKwaZulu-Natal.
Ingoma le iza ngemva kwevidiyo eyarhatjheka eenkundleni zokuthintana ibonisa iKosi uMisuzulu kaZwelithini akhipha amagama abuhlungu kuNdlovukazi uNomzamo.
Kulapho ke iKosi uMisuzulu abonakale arhamulile begodu abuza ukuthi wenzani ngakho lokho akwakhayo eMzini weKosi yeEmachobeni.
Umkhulumeli weKosini, uMpiyakhe Buthelezi uqinisekise bonyana uMuzi weKosi uyilalele ingoma leyo begodu yathatha nesinyathelo esirhabako.
“Iindaba zeNdlu YeKosi yamaZulu kumele zihlonitjhwe. Lezi akusizo iindaba zomphakathi, ngidosele umvumi lo umtato ngimtjela lokho.
FUNDA NALOKHU: https://ilangabinews.co.za/ukusebenzisana-kwabo-kuvusa-iinkulumo-zokubuyelana/
Kufanele eze neKosi yakhe eMzini weKosi ukuzokuhlathulula bonyana kungani akhiphe ingoma ngeendaba zeNdlu YeKosi yamaZulu,” kwatjho uButhelezi.
Wangezelela ngokuthi nanoma ilanga lokulalela icala lingakaqinisekiswa, kodwana lizakuqinisekiswa ngesikhathi esingaqedi ihliziyo.
Leli akusilo ihlandla lokuthoma uSminofu azithole ngaphakathi kwamafutha atjhisako. Enye yeengoma zakhe ezaziwa khulu ethi Imali Yase Absa, yalandela indaba eyarhatjheka khulu eenkundleni zokuthintana.
Kanti ingoma ethi Izipikha beyikhomba umfundisi odumileko wesondo lakaShembe eNazaretha owabekwa amacala wokusebenzisa imali ebegade ihloswe ukuthenga ama-loudspeaker budedengu.
